ବଣହରାଠାରେ ଭଗବତ ଗୋସାଇଁଙ୍କ ଦୋଳମେଳଣ

କେନ୍ଦ୍ରାପଡା, ୧୯।୦୩: କେନ୍ଦ୍ରାପଡା ଜିଲ୍ଲା ଅନ୍ତର୍ଗତ ଭାଗବତପୁର ପଞ୍ଚାୟତ ବଣହରାଠାରେ ଭଗବତ ଗୋସାଇଁଙ୍କ ଦୋଳମେଳଣ ଅନୁଷ୍ଠିତ ହୋଇଯାଇଛି । ଏଥିରେ ବିଭିନ୍ନ ମଠ ମନ୍ଦିରର ରାଧାକୃଷ୍ଣ ଠାକୁର ସୁନ୍ଦର ଭାବରେ ବିମାନରେ ସଜ୍ଜିତ ହୋଇ ମେଳଣରେ ଉପସ୍ଥିତ ପହଞ୍ଚିଥିଲେ । ମେଳଣରେ ମୁଖ୍ୟ ଜମିଦାର କାନୁନଗୋଙ୍କ ଠାକୁର ଗୋପୀନାଥ ଜୀଉ, ଗୋବିନ୍ଦ ଅଧିକାରୀ ଠାକୁର, ପଣ୍ଡା ଦାସଙ୍କ ଠାକୁର ଏବଂ ପୋଟଳି ମଠର ଅଧୀଶ୍ଵରଙ୍କ ସହିତ ପ୍ରଥମେ ବିରାଜିତ ହୋଇଥିଲେ ।

ପରେ ପରେ ବଣହରା ଗ୍ରାମର ମିଶ୍ରଘର ଠାକୁର ରଘୁନାଥ, ଫୋଗଳ ଗ୍ରାମର ଶତପଥିଙ୍କ ଘରଠାକୁରଙ୍କ ସହିତ ପ୍ରୋଶେସନରେ ଆସି ମେଳଣସ୍ଥାନରେ ପହଞ୍ଚିଲେ । ପରେ ବାଘିଳ ମଠ, ଜଂଟିଳ ମଠର ଠାକୁର ମଧ୍ୟ ନିଜ ନିଜ ପ୍ରୋଶେସନରେ ଆସି ମେଳଣ ସ୍ଥଳରେ ଉପସ୍ଥିତ ହୋଇଥିଲେ ।

ପରେ ଅନ୍ତାଳ ମଠର ରଘୁନାଥ, ଗୋଲବାବୁଙ୍କ ବିମାନ, ବଣହରା ଇନ୍ଦ୍ରମାନି ମିଶ୍ରଙ୍କ ରଘୁନାଥ ଏବଂ ମଠାଧୀଶ ମଦନମୋହନ ସୁନ୍ଦର ଭାବରେ ସଜ୍ଜିତ ହୋଇ ଆସି ପହଞ୍ଚିଲେ । ସେହି ସମୟରେ ଭକ୍ତଙ୍କ ହରିବୋଲ ହୁଳହୁଳିରେ ଗ୍ରାମ ବୈକୁଣ୍ଠରେ ପରିଣତ ହୋଇଥିଲା। ଏହି ମେଳଣକୁ ଦେବକୀ ନନ୍ଦନ ମିଶ୍ର, ପିତମ୍ବର ମିଶ୍ର, ବିଷ୍ଣୁ ମିଶ୍ରଙ୍କ ସମେତ ଗ୍ରାମର ଅଣ ନେତୃବୃନ୍ଦମାନେ ଖୁବ ସୁନ୍ଦର ଭାବରେ ପରିଚାଳନ କରିଥିଲେ ।